|
|
|
< back
|
|
BERNARD SWANEPOEL,
HARMONY-VETERANE BEGIN MYNGROEP |
|
|
|
12 July 2008 |
SAKE24 |
Author Dewald van Rensburg |
SA |
|
|
Mnr. Bernard
Swanepoel, voormalige uitvoerende hoof van Harmony, is
in die proses om ’n nuwe, moontlik gediversifiseerde
mynmaatskappy op die been te bring.
Dié mynbou-veteraan het die wêreld se vyfde grootste
goudmaatskappy geskep uit ’n versameling marginale myne
voordat hy verlede jaar onverwags tydens ’n
boekhou-skandaal bedank het.
Nou blyk dit dat hy, tesame met ’n groep ander Harmony-veterane,
weer van voor af begin.
Daar is Vrydag op die JSE se nuusdiens aangekondig dat
Swanepoel se nuwe konsultantemaatskappy, To The Point
Growth Specialists, ’n aanbod gaan doen vir alle aandele
van Village Main Reef Gold Mining Company, ’n dormante
goudmaatskappy met geen bates buiten ’n 74-jarige
notering op die JSE nie.
Nadat die transaksie afgehandel is, sal planne vir
Village Main se herlewing aangekondig word, sê me.
Lizelle du Toit, ’n Harmony-woordvoerder wat vroeër
vanjaar ook by To The Point aangesluit het.
Die Village Main-notering sal gebruik word as beginplek
vir ’n nuwe myngroep deur middel van verkrygings, het sy
Vrydag bevestig.
Dié verkrygingsveldtog sal breër as goud mik en Village
Main sal mettertyd herleef as ’n gediversifiseerde
mynbou-belegging vir kleiner beleggers, sê sy.
Die aanbod vir alle aandele is ’n regulatoriese vereiste
wanneer ’n belang van meer as 35% in ’n genoteerde
maatskappy bekom word.
To The Point mik egter wel om minstens 50% van Village
Main in besit te neem, sê du Toit.
Swanepoel se maatskappy het reeds die afgelope maand ’n
47,8%-belang bekom waarvan altesame 37,8% toevallig by
Harmony gekoop is vir sowat R1 miljoen.
Harmony het in 2006 onder Swanepoel se leierskap ook dié
notering probeer oorneem deur dieselfde belang te bekom.
Op daardie tydstip was Harmony nog van plan om sy
mededinger Gold Fields oor te neem en moontlik die
vergrote maatskappy se marginale myne afsonderlik in die
Village-notering te groepeer.
Dié oorname het misluk en Harmony het sedertdien geen
nut vir die ongebruikte notering gevind nie.
Die sowat 46c per aandeel wat To The Point vir Harmony
se Village Main-belang sal betaal, verteenwoordig ’n
groot korting op die prys wat vroeër vir ’n afsonderlike
10%-belang betaal is, asook die beplande aanbod aan alle
aandeelhouers.
Die 10% is teen R1 per aandeel by ’n private
aandeelhouer gekoop vir altesame R606 809,00, is Vrydag
gesê.
Die aanbod aan die oorblywende aandeelhouers sal na
verwagting ook R1 per aandeel wees – altesame net meer
as R3 miljoen.
Dié aandeel, wat Donderdagaand nog op 35c gesluit het,
se prys het Vrydag teen sluitingstyd met 243,75% gestyg
tot R1,10.
To The Point bestaan meestal uit oud-bestuurslede van
Harmony, onder meer mnr. Clinton Halsey, voorheen die
goudmaatskappy se finansiële bestuurder wat saam met
Swanepoel ’n medestigter is.
As ’n konsultantemaatskappy het dit reeds die omstrede
Camec asook Mintails as kliënte gewerf.
|
|
|
|
